ജാന്‍ 29, 1993

വെളുപ്പിനേ തന്നെ പാടത്തേക്ക് പോയി.

ട്രാക്റ്റര്‍ അടിപ്പിച്ചു. 85 രൂപയായി. ഇന്ന് പാടത്തുന്ന് ഒരു ബ്രാലിനെ കിട്ടി. പാറ്റി നില്‍ക്കുകയായിരുന്നു. ഞാന്‍ കൈക്കോട്ട് വച്ച് ഒറ്റ കളമ്പ് കൊടുത്തു. ഒരു മുക്കാ കിലോ തൂക്കം വരും. കോര്‍മ്പയിലിട്ട് കൊണ്ടുവരുമ്പോള്‍ എല്ലാവരും ചോദിച്ചു.

തോട്ടുവക്കത്ത് വച്ച വാഴക്കണ്ണുകള്‍ മുളച്ചുതുടങ്ങി. പത്തെണ്ണം വച്ചിട്ടുണ്ട്. അടുത്താഴ്ച ഫാക്റ്റംഫൊസ് 20:20 ഇടണം. നല്ല സുപ്പറ് കണ്ണുകള്‍ നോക്കിയാ ഞാന്‍ വാങ്ങി വച്ചത്. രവിച്ചേട്ടന്‍ തൃശ്ശൂര്‍ന്ന് വാങ്ങിയ കണ്ണീന്ന് എനിക്കൊരു പത്തെണ്ണം തരണം എന്ന് പറഞ്ഞ് കൊണ്ടുവന്നതാ.

ഒരു അഞ്ചുപടലയെങ്കിലുംമുണ്ടായാല്‍ മതിയായിരുന്നു. അഞ്ചുപടലയുണ്ടായാല്‍, ഒരു ക്ഉല 8 കിലോയെങ്കിലും വന്നാല്‍, 40 രൂപ കിട്ടും. അപ്പോ എങ്ങിനെ പോയാലും 350 രൂപ കിട്ടും മൊത്തം. ഇത്തവണ ആ കാശുകൊണ്ട്, അലാറം ഉള്ള അജന്തയുടെ ഒരു ക്ലോക്ക് വാങ്ങണം. അമ്മയുടെ ചെരിപ്പ് ആകെ നാശമായി. ചുള്ളത്തിക്ക് ഒരു ചെരുപ്പും വാങ്ങണം.

11 മണിയായിട്ടാ ക്ലാസിലെത്തിയത്.

എണിറ്റത്: 5
കിടന്നത്: 10:30