ഫെബി 5, 1993

ഇന്നലെ രാത്രി പെരുവല്ലൂര്‍ അമ്പാടിയില്‍ സിനിമക്ക് പോയി. സുനിയും പ്രകാശനും കൂട്ട് വന്നിരുന്നു.

അവിടത്തെ ആസ്ഥാന സുന്ദരിയും പ്രകാശന്റെ എക്സ് പ്രേമ ഭാജനവുമായിരുന്ന ക്ടാവ്, കല്ലൊരക്ക് വന്ന കൊച്ചിക്കാരനൊരുത്തന്റെ കൂടെ ഓടിപ്പോയതിന്റെ ആഘോഷം സോമേട്ടന്റെ പണിനടന്നുകൊണ്ടിരിക്കുന്ന പുതിയ വീടിന്റെ വാര്‍ക്കപുറത്ത് വച്ച് നടത്തി. കമ്പനിക്ക് വേണ്ടി ഞാനൊരു വിത്സ് വലിച്ചു. നമുക്കവള്‍ ഒളിച്ചോടിയാലെന്താ.. ഇല്ലേലെന്താ.

നമ്മുടെ അങ്ങാടിയിലെ ക്ടാങ്ങളെ നേരാം വണ്ണം പരിപാലിക്കാന്‍ എനിക്ക് പറ്റുന്നില്ല. പിന്നല്ലേ ഇവിടെ!

പോരും വഴി തൃശ്ശൂര്‍ന്ന് ഒരു ചെടി പന വാങ്ങിയിരുന്നു. 5 രൂപയായി. തൃശ്ശൂര്‍ റൌണ്ടില്‍ ബസ് കാത്തുനില്‍ക്കുമ്പോള്‍ ഒരു അങ്ങാടി പശു എന്നെ കുത്താന്‍ വന്നു. എന്റെ എത് പാര്‍ട്ടാണ് ആ പിശാചു പിടിച്ച പശൂനെ ഹഢാദാകര്‍ഷിച്ചേന്നറിയില്ല. കുത്തു കൊണ്ടിരുന്നെങ്കില്‍ എന്റെ പണ്ടം കലങ്ങിപ്പോയേനിരുന്നു. ഭാഗ്യായി.

ലേയ്റ്റായെങ്കിലും കോളേജില്‍ പോയിരുന്നു. ഓലക്കിടയിലൂടെ നിതയെ നോക്കി. നല്ല ഗോതമ്പു മണിപോലത്തെ കൊച്ചാണവള്‍. പല്ലിനൊരു മഞ്ഞ കളറുണ്ട്. അത്രെ ഞാന്‍ നോക്കിയിട്ട് പ്രശ്നമൊള്ളൂ. ഒരു അര ഇഞ്ച് പുഷ്ടിമയും കൂടെ മൊത്തം വന്നാല്‍ പെണ്ണില്‍ പെണ്ണ് കൊതിക്കും. തീരെ കാശൊള്ള കുടുമ്മത്തെയല്ല. ആ നിലക്ക് എനിക്ക് നല്ല മാച്ചാ..!

അനില്‍ പറഞ്ഞത് വച്ച് അവള്‍ നമ്മുടെ ചൂണ്ടയില്‍ പെട്ടുകിടക്കുന്നുണ്ടോ എന്നൊരു ഡൌട്ടില്ലാതില്ല. ഒരാഴ്ച കഴിയട്ടെ ഒന്ന് വലിച്ച് നോക്കണം. നായരാണെന്ന പ്രശ്നം അപ്പോഴും ചോദ്യചിഹ്നമായി നില്‍ക്കുകയണ്.

അടുത്ത ജന്മത്തില്‍ ഞാന്‍ എന്തായാലും ഒരു നായരായേ ജനിക്കൂ. അത്രക്കും മടുത്തു!!

എണീറ്റത്: 5:00 ന്
കിടന്നത്: 11:30 ന്